"Viltu vinna milljarð" - frábær bók

Ég fékk bókina ,,Viltu vinna milljarð´" í jólagjöf og það er ekkert skemmtilegra en að sökkva sér í bók á borð við þessa.  Þetta er fyrsta skáldsaga indverska höfundarins Vikas Swarup, og óhætt að vænta mikils af höfundi ef hann heldur áfram á þessari braut.

Sagan segir frá indverska munaðarleysingjanum Ram Mohammed Thomas sem vinnur heilan milljarð í spurningaþætti, en í stað þess að fá verðlaunin, er hann handtekinn fyrir svindl. Hann rekur sögu sína fyrir lögfræðingi sínum og lýsir því hvernig atburðir í lífi hans urðu til þess að hann hafði rétt svör á reiðum höndum í keppninni.  Í frásögn hans er dregin upp átakanleg mynd af eymd og fátækt í Indlandi en þrátt fyrir það glittir í fegurð mannlífsins, m.a. gegnum væntumþykju og vináttu aðalpersónunnar í garð náunga sinna.  Það er líka mikill húmor í sögunni.

Sagan vekur upp margar siðferðilegar spurningar eins og þá hvort maður eigi að láta sig náungann einhverju varða eða ekki og hún sýnir ótrúlega stéttaskiptingu Indlands. Þetta er bók sem opnar sýn inn í nýjan menningarheim og það er ekki hægt að leggja hana frá sér.  Ég mæli eindregið með þessari bók.

Athugasemdir

[Sigurjón, 29.12.2006 kl. 02:46]

Ég er viss um að þetta er áhugaverð bók.  Mig hefur a.m.k. lengi langað til Indlands. Hvar á Indlandi á Ram heima?  Ég á nefnilega nokkra indverska vini og þeir segja allir að Indland sé mjög fjölbreytilegt.

[Gunnar Helgi Eysteinsson, 29.12.2006 kl. 09:42]

Takk fyrir þetta. Ég ætla að lesa þessa bók

[Kristin María (IP-tala skráð) 29.12.2006 kl. 16:06]

Hæ hæ, gaman að lesa síðuna þína Margrét - ég er alltaf á leiðinni til þín í heimsókn í Vonarstrætið - hafðu það gott yfir áramótin

Kveðja Kristín María

[Ólafur fannberg, 1.1.2007 kl. 10:00]

kvitt