Fiðrildi og hefðarfrúr

Í svonefndri ,,Fiðrildaviku” í síðustu viku stóð UNIFEM á Íslandi fyrir metnaðarfullri fjáröflun fyrir styrktarstjóð sem berst fyrir afnámi ofbeldis gegn konum í Austur-Kongó, Líberíu og Suður-Súdan, þar sem konur og stúlkur hafa orðið fyrir gegndarlausu ofbeldi.  Með fjáröflunarátakinu var Íslandi ætlað að hafa ,,fiðrildaáhrif” en það hugtak vísar til þess að vængjasláttur örsmárra fiðrilda í einum heimshluta geti haft áhrif á veðurfar annars staðar á hnettinum.  Það er full ástæða til að óska UNIFEM til hamingju með þetta frábæra framtak og óhætt er að fullyrða að vel hafi tiltekist hvað árangur átaksins varðar, enda hefur sá góði árangur þegar vakið athygli víða um heim. 

Aðgangseyrir 70.000 krónur

Hins vegar bar einn skugga á þetta annars frábæra framtak, en það var fjáröflunarkvöldverðurinn sem haldinn var á lokadegi átaksins, laugardaginn 8. mars sl., sem jafnframt er alþjóðlegur baráttudagur kvenna.  Kvöldverðurinn var haldinn í Frímúrarahöllinni sem var í sjálfu sér skemmtilegt, því segja má að þar með hafi konurnar lagt undir sig þetta hefðbundna karlavígi.  En aðgangseyrir að lokahátíðinni var 70.000 krónur (!) fyrir hverja konu.  Fjölmargar konur höfðu þá tekið þátt í átakinu af heilum hug, gengið niður Laugaveginn í Fiðrildavikunni og hringt í söfnunarsímann til að leggja átakinu lið.  En lokahátíð átaksins var einungis ætluð þeim konum sem gátu borgað heilar 70.000 krónur fyrir máltíð til styrktar þessu verðuga verkefni.  Lokahátíðin var þar með einungis ætluð fáum útvöldum.  Auk þess var mælst til þess að konurnar klæddust hvítu og einhverju sem minnti á fiðrildi... 

Ekki til fyrirmyndar

Svona fokdýrir kvöldverðir eru að amerískri fyrirmynd og það er miður að kvennasamtök skuli styðja við þróun í átt til aukinnar stéttaskiptingar hér á landi með þessum hætti.  Það hefði verið hægt að bjóða margfalt fleiri konum að taka þátt í hátíðarkvöldverði á alþjóðegum baráttudegi kvenna fyrir margfalt lægra verð og ná sama árangri hvað fjáröflun varðar – og ná margföldum fiðrildaáhrifum hvað það varðar að styrkja samstöðu og tengsl kvenna hér á landi.  Einnig þekkist það að félagasamtök hafi efnt til styrktartónleika með fremur hóflegum aðgangseyri þar sem flestir ættu að geta lagt sitt af mörkum og er það vel. 

Það er alls ekki ætlunin að lítið úr frábæru framtaki UNIFEM með átaki Fiðrildavikunnar, en ég veit að fjölmargar konur eru sama sinnis og ég varðandi umræddan hátíðarkvöldverð og því eðlilegt að koma þessari skoðun á framfæri.     

Athugasemdir

[Jenný Anna Baldursdóttir, 13.3.2008 kl. 20:19]

Sammála og takk fyrir frábæran pistil.

[Bjarni Kjartansson, 14.3.2008 kl. 11:26]

Hofmóðurinn er og verður ekkert bundinn við pólitískar skoðanir fólks, það kom þó í ljós á þessu kvöldi.

ÉG er svona útaf fyrir mig, ekkert sérstaklega sammála þér um að staðsetningin hafi verið góð.  Tel Húsið vera fyrir Regluna og Reglubræður og systur, aðra ekki. Sérlega þótti mér furðulegt, að fólk tengt Ólafi Ragnari vildi fara þarna inn, þar sem það var ormurinn hann Ólafur, sem setti klettþungar byrgðar á Regluna með ofur Fasteignagjöldum.  

Hitt um snobbið er það að segja, að ,,heima" fyrir vestan var nú sagt um þá sem reygðu sig mikið upp og vildu nudda olnbogum við ,,fínu" embættismennina,  ----,,ætli þeir þurfi ekki að beygja sig til að skíta, blessaðir"  Eða ,-----,,það er jafn mikil lykt þegar hann prumpar karlinn sá".

Nei mín kæra, virðing eykst ekkert við aðgöngumiðaverðið.  Virðing verður til af öðru og óbrotgjarnara en fiðrildagrímu, sem minnir á leikaraskap Frönsku hirðarinnar, þegar fólkið svalt og yfirfrúr spuðu af hverju fólkið æti ekki kökur, þar sem það vantaði brauð.

Svona breytist seint.

Miðbææjaríhaldið

að Vestan og afar stoltur af því og forfeðrum sínum.

[Guðrún Helgadóttir, 18.3.2008 kl. 10:27]

Góður pistill Magga - þarna kíkir náttúrlega í jafnaðarkonuna í þér