Gröndalshús áfram í miðborginni?

Ég lagði það til í borgarstjórn nýlega að hús Benedikts Gröndal fengi að standa þar sem það er.  Mér finnst synd að rífa hús upp með rótum til að koma þeim fyrir á safni.  Þessari tillögu minni var vísað frá, en hins vegar lagði borgarstjóri til að skipulagsráði yrði falið að kanna hvort unnt væri að fina húsinu stað í Grjótaþorpinu.  Það væri skemmtilegt að eiga ,,skáldahús" þar, enda myndi það njóta sín á þeim stað.  Akureyringar hafa sýnt sínum skáldum mikinn sóma með Davíðshúsi, Sigurhæðum Matthíasar og Nonnahúsi.  Ekki hafa hús reykvískra skálda verið varðveitt sérstaklega til minningar um þau skáld sem í þeim bjuggu.Benedikt Gröndal var eitt merkasta skáld sinnar tíðar á Íslandi og endurminningar sínar, Dægradvöl, skráði hann í Gröndalshúsi. Sú bók er merk heimild varðandi sögu Reykjavíkur á 19. öld.  Væri verðugt að koma þar upp safni til minningar um Benedikt Gröndal og samtíð hans í Reykjavík.  Einnig kæmi til greina að hafa í húsinu lifandi starfsemi sem félli að aldri og sögu hússins, svo fremi að húsið sjálft væri alfriðað. 

 

Athugasemdir

[Lárus Vilhjálmsson, 16.3.2007 kl. 21:49]

Ég er nú svo lítill reykvíkingur að ég hef ekki hugmynd um hvar Gröndalshús er. En Benedikt er tvimælalaust eitt merkasta skáld Reykjavíkur á 19. öld.

[Guðrún Helgadóttir, 18.3.2007 kl. 17:43]

Ég tek undir með þér í þessu - hugsaðu þér ef það hefði nú tekist á sínum tíma að vernda Fjalaköttinn?

[Gunnar Th. Gunnarsson, 18.3.2007 kl. 23:44]

Fjalakötturinn var gjörónýtt hús og ekki raunhæft að gera neitt við það, nema þá endurbyggja frá grunni.

En er ekki hægt að tala um Unu hús efst í Grjótaþorpi sem skáldahús?