Græn skán á Sjálfstæðisflokki

Það er pínlegt að sjá hvernig Staksteinar reyna í dag að sannfæra lesendur um að Sjálfstæðisflokkurinn hafi verið að "laga sig að nýjum viðhorfum í umhverfismálum" og þakkar það fyrst og fremst Illuga Gunnarssyni fyrrum aðstoðarmanni Davíðs Oddssonar.  Segir að Einar Oddur sé líka kominn í þennan hóp grænna sjálfstæðismanna - en það vill reyndar svo til að Einar Oddur er tengdafaðir Illuga.  Fleiri flokksmenn eru nefndir sem hafa viðrað umhverfisvæn viðhorf.

Við skulum ekki láta þetta blekkja okkur nú í aðdraganda kosninga.  Það er ekki langt síðan Ólafur F. Magnússon var úthrópaður - í orðsins fyllstu merkingu - af landsfundi Sjálfstæðisflokks af því umhverfisviðhorf hans áttu alls ekki upp á pallborðið í flokknum.  Græna skánin er aðeins þunnt lag yfir gráa skrápnum.

Sjálfstæðisflokkurinn hefur áður lofað þjóðarsátt um stór mál fyrir kosningar en lítið orðið um efndir.

Athugasemdir

[Haukur Nikulásson, 25.2.2007 kl. 22:39]

Sæl Margrét, 

Illugi Gunnarsson virkar á mig eins og einmana og villuráfandi sauður í Sjálfstæðisflokknum í þessum efnum. Sjálfstæðisflokkurinn verður ekki grænn á einum manni eins og Illuga.

Sjálfstæðisflokkurinn á ennþá eftir að ganga mun lengra til að blekkja þjóðina til fylgis við sig. Það verður hlutverk annarra að sannfæra hugsandi fólk um að það sé kominn tími til að gefa langvarandi valdþreytu Sjálfstæðisflokksins gott og verðskuldað frí. 

[Hildigunnur Rúnarsdóttir, 26.2.2007 kl. 00:57]

heh, „Sjálfstæðisflokkurinn“ er ekki grænn fyrir fimmeyring. Illugi er reyndar eina ljósglætan í þeim afturhaldsflokki!

burt með þá, og það sem fyrst.

[Baldvin Jónsson, 26.2.2007 kl. 10:29]

Hvenær fáum við að sjá framboðið spretta fram?  Hvar get ég skráð mig í "flokkinn" ykkar?  Er JBH með?

[Páll (IP-tala skráð) 26.2.2007 kl. 17:06]

Margrét

Ekki gera lítið úr "bættri" stefnu annarra flokka. Við eigum að samgleðjast og þakka fyrir alla þá nýju aðila sem nú hafa tekið upp nýja trú. Við eigum að gleðjast og leiðbeina þeim, ekki gefa í skin fyrirfram að það sé verið að blekkja fólk. Það sem máli skiptir í íslenskri pólitík í dag er að það þarf að hefja hana til vegs og virðingar á ný. Það gerum við jákvæðu hugarfari, ekki skítkasti í pólitíska andstæðinga okkar.

kveðja,

Páll

[Gunnsteinn Þórisson, 26.2.2007 kl. 21:55]

Ég tel ekkert athugarvert við það að vera hægri-grænn, þó margir telji það ómögulegt. Ætla ég ekki að neita því að við Sjálfstæðismenn leggjum mörg málefni ofar en umhverfismál upp á hálendi.

[Gunnar Th. Gunnarsson, 1.3.2007 kl. 11:31]

Það að Ólafur F. hafi ekki átt upp á pallborðið hjá Sjálfstæðisflokknum er ekkert skrítið því skoðanir hans í umhverfismálum eiga einfaldlega meira skylt við VG. Þeir eru á móti nýtingu en með vernd. Sjálfstæðismenn líta ekki á málið með slíkri "rör sýn".

Og hvað með það þó Einar Oddur sé tengdafaðir Illuga? Ert þú ekki dóttir hans pabba þíns?

[Púkinn, 2.3.2007 kl. 09:29]

Þeir eru að verða hræddir - það er nú ekki flóknara en það.  Hræddir við fylgistap ef fram kæmi raunhæfur valkostur fyrir þá sem telja sig hægri-græna.

Það er síðan allt annar handleggur hvort á bak við þetta er einhver raunveruleg stefnubreyting, eða bara viðleitni rétt fyrir kosningar til að reyna að draga úr líkum á því að þeirra kjósendur leiti annað.