Framboðsmál

 

Margar sögur hafa gengið um framboðsmál mín og sumar verulega undarlegar. Ég get líklega engum um kennt nema sjálfri mér, því ég hef ekkert látið uppi. Þannig varð það bara að vera, enda fannst mér nauðsynlegt að fá svigrúm til að vinna að næstu skrefum með helsta stuðningsfólki mínu og vinum.  Við vinnum af fullum krafti og það styttist í þetta

 

Ég sá einhvers staðar að verið var að velta vöngum yfir því að tímaskyn mitt væri ekki eins og annars fólks. Ég boðaði í byrjun mánaðarins að tíðinda af framboðsmálum væri að vænta "handan við hornið" og enn hefur ekkert verið gefið upp. Það er ekkert dularfullt við þetta. Ég minni á að sumir vilja alltaf kalla mig "ungu konuna" í pólitíkinni. Staðreyndin er auðvitað sú að ég telst ekki ung, nema  þá einna helst þegar ég heimsæki elliheimilin, eins og einn góður bloggari benti á. En ég get þó lagt mitt af mörkum til að draga tímann svolítið á langinn

 Sögurnar, já. Sú skrautlegasta sem ég hef heyrt er reyndar ættuð frá innsta koppi í búri Frjálslyndra. Kappinn sat í heita pottinum í einni sundlauga bæjarins í síðustu viku og gerði sig breiðan. Hann fullyrti að ég hefði nánast grátbeðið forsvarsmenn Frjálslynda flokksins um að fá að koma í herbúðir þeirra á ný, en þeir ekki viljað mig.Þegar ég heyrði þessa sögu fannst mér hún reyndar dálítið fyndin, jafn fjarstæðukennd og hún er.  En auðvitað er þetta bara enn ein sorgleg staðfesting á því hve frjálslega sumir menn umgangast sannleikann...

Athugasemdir

[Púkinn, 22.2.2007 kl. 09:40]

Eins og Púkinn hefur sagt hér vonast hann til að sjá raunhæfan valkost fyrir sig í komandi kosningum.  Púkanum finnst hins vegar slæmt ef Reynir Harðarson er genginn til liðs við Samfylkinguna, en hvað um það - vonandi verður þetta framboð að alvöru.  Hvort þú vilt hins vegar hafa Púkann fyrir stuðningsaðila er auðvitað allt annar handleggur.

[klakinn (IP-tala skráð) 22.2.2007 kl. 20:57]

Já það er eins með mig. Við sem flokkumst undir að vera peð í taflinu bíðum eftir að geta veitt þér stuðning, þegar þar að kemur.

[Árni Gunnarsson (IP-tala skráð) 23.2.2007 kl. 15:44]

Ég varð að klípa mig fast í handlegginn þegar ég las háðsyrði Margrétar Sverrisdóttur um þá sem leyfðu sér að umgangast sannleikann frjálslega. Hvenær fórst þú Margrét að bera virðingu fyrir sannleikanum? Hefur þú kannske aldrei gert þér ljóst að sannleikurinn er raunverulega til og í raun afar einfalt fyrirbæri? Hvar er hann fólginn sannleikurinn á bak við þá margítrekuðu sögu þína að fulltrúar frá Nýju afli hefðu yfirtekið skrifstofu flokksins í Aðalstræti?. Ekki fannst þér nú að minna mætti vera en að endurtaka þessi ósannindi á Flokksþinginu í framboðsræðu þinni þar. Þú hefðir gerst mátt vita að enginn! ég endurtek enginn okkar sem þar tóku að sér að sitja fyrir hönd Frjálslynda flokksins kom úr röðum Nýs afls. Og þetta voru kaldar kveðjur til hins aldraða sómamanns Halldórs Halldórssonar skipstjóra sem var eindreginn stuðningsmaður þinn og ég hef frétt að gengið hafi úr flokknum er þú yfirgafst hann.

 Nú skora ég á þig að sýna þínum nýju stuðningsmönnum frá Framtíðarlandinu og er, eftir minni bestu vitneskju vammlaust sómafólk eins og best má sjá í pólitískum eldmóði þess,-sýna þessu fólki hugþekka ljóðið sem þú settir inn á bloggið þitt handa lesendum að raula svona um jólin! Var einhversstaðar þarna að finna aumasta rasisma og niðurlægingu á fólki af pólsku þjóðerni sem sést hefur á opinberum vettvangi hér á landi? Ert þú ekki hinn hjartahreini boðberi andófs gegn rasisma á Íslandi og ert þú ekki unga og glæsillega konan sem réðst á meintan rasismaáróður fulltrúa flokksins þíns á Alþingi? Af nógu er að taka um skilning þinn á því undarlega fyrirbæri sannleikanum. En að lokum: Ertu kannske búin að biðja hina ágætu eiginkonu Guðjóns Arnars afsökunar á óþverrakveðjunn sem þú sendir henni þarna fyrir jólin? Eða er það kannske fyrir neðan þína virðingu að biðja fólk af pólskum uppruna afsökunar?