www.islandshreyfingin.is

Vil benda öllum væntanlegum kjósendum og öðrum, sem ekki hafa enn gert upp hug sinn, að fara inn á vefinn okkar: www.islandshreyfingin.is

Þar er að finna stefnuskrá okkar, upplýsingar á táknmáli og margar áhugaverðar greinar. Einnig eru þar listar yfir frambjóðendur í öllum kjördæmum og myndir af þeim og margt fleira.

Skrifstofan okkar í Kirkjustræti 4 er opin daglega frá 10-22.

Kjósið með hjartanu á laugardaginn !

 

 

 

Íslandshreyfingin bætir við sig fylgi

Samkvæmt nýjustu könnun Gallup bætir Íslandshreyfingin við sig fylgi.  Ég vona að það verði framhald á því.  Ómar Ragnarsson stendur í ströngu.  Hann leggur allt sitt í sölurnar til að bjarga landinu okkar af því að eftir fjögur ár verður of seint að kjósa um það. Ég hef átt því láni að fagna að kynnast honum vel á liðnum mánuðum og hann er sannarlega einstakur maður, eldklár og óvenju fjölhæfur og fjölfróður.  Svo er hann umfram allt einstakur mannvinur.  Ég veit að það væri mjög mikill fengur að manni eins og honum á Alþingi.

Leggið Íslandshreyfingunni lið með atkvæði ykkar á kjördag!

Skoðið stefnuna og fólkið á www.islandshreyfingin.is  

P.S. Nýjasti leikþáttur stjórnvalda í lagalegum ofsóknum gegn Baugi kostaði um 100 milljónir sem ég hefði viljað nota í annað.  En olíusamráðsfurstarnir sluppu með skrekkinn..  Það er ekki sama hver á í hlut.

Hlutdrægir sjónvarpsþættir

Eftirfarandi grein mín birtist í Blaðinu í gær og hefur vakið mikla athygli og hörð viðbrögð.  Ég vil ítreka að megininntak greinarinnar er að sjónvarpsþættir með yfirheyrslum pólitískra fulltrúa eru hlutdrægir og ekki líklegir til að efla áhuga fólks á þátttöku í pólitík.  Athugasemdir um pólitíska fortíð spyrla voru meintar sem gagnrýni á að of margir þeirra eigi sér einsleita, pólitíska fortíð.  Þetta á auðvitað ekki við um alla og átti allra síst að vera persónuleg árás á einstaka fréttamenn.  MSv 

 

Nú sem fyrr, í aðdraganda kosninga, keppast fjölmiðlar við að yfirheyra fulltrúa stjórnmálaflokkanna um stefnu þeirra í öllum helstu málum. Kapp sjónvarpsstöðvanna var raunar slíkt, að farið var af stað með umræðuþætti í öllum landshlutum mörgum vikum áður en þurfti að tilkynna framboð samkvæmt lögum um kosningar.  En þetta vinnulag gefur gömlu flokkunum óneitanlega mikið forskot á kostnað nýrra framboða. Ég leyfi mér að fullyrða að þessir sjónvarpsþættir hafi mjög neikvæð áhrif á nýliðun í pólitík, því það er hreint ekki auðvelt fyrir nýtt fólk, sem er alveg óvant kastljósi fjölmiðlanna, að mæta í þessar þriðju gráðu yfirheyrslur.  Ýmsum finnst þetta einn stærsti þröskuldurinn varðandi það að taka að sér að leiða lista. 

Uppstilling hlutdræg

Uppstilling fulltrúa flokkanna í þáttunum er mjög hlutdræg.  Stjórnarliðarnir tveir, fulltrúar Sjálfstæðisflokks og Framsóknar, sitja jafnan vinstra megin á sviðinu, frá áhorfendum séð, og hafa rúmt um sig.  Fulltrúar stjórnarandstöðu og annarra framboða eru hins vegar allir settir saman hægra megin og af því sviðið er smátt, sitja þeir mjög þétt  og virka heldur ámátlegir miðað við fulltrúa stjórnarflokkanna.  Þetta kemjur illa út fyrir stjórnarandstæðingana og auk þess vill það verða svo að stjórnarliðar fá meiri tíma til að tjá sig af því umræðunni er vísað til skiptis milli þessara tveggja misstóru hópa á sviðinu. Stundum standa fulltrúar flokkanna reyndar við hringborð, en sú uppstilling er heldur óhagstæð konum, sem ofast eru talsvert lægri í loftinu en karlar.  Karlarnir virðast þá óhjákvæmilega valdsmannslegri. 

Spyrlar hlutdrægir

Svo er það hlutur spyrlanna.  Það vita allir, að þeir sem spyrja spurninganna í þessum þáttum eru innvígðir og innmúraðir í stjórnarflokkana.  Þetta fólk er örugglega ekki flokksbundið í dag, starfs síns vegna, en sum þeirra hafa ýmist gegnt stöðum formanna Sambands ungra sjálfstæðismanna á sokkabandsárum sínum, verið í stjórn Vöku í Háskóla Íslands, eða verið í sérverkefnum fyrir stjórnarflokkana og hafa við ýmis tækifæri látið berlega í ljós hver pólitísk afstaða þeirra er.  Stundum er framkoma þeirra við fulltrúa flokka nánast grimmdarleg og það er ekkert sérlega aðlaðandi sjónvarpsefni.  Sem dæmi má nefna, að kona ein mætti sem fulltrúi Vinstri grænna í þátt um samgöngumál.  Hún hafði aldrei fyrr mætt í beina útsendingu í sjónvarpi en stóð sig ljómandi vel framan af.  Spyrillinn hefði mátt taka tillit til þess að þarna var óþekktur fulltrúi sem varla gæti verið vanur því að koma fram í sjónvarpi.  En það var öðru nær.  Hann sagði við hana að fyrst Vinstri græn vildu forgangsraða í samgöngumálum, þá væri gaman að fá að vita hvað þau teldu að ætti að mæta afgangi.  Henni varð svarafátt, enda er það væntanlega svo að þegar maður forgangsraðar þá varðar mann minnst um það sem á að mæta afgangi.  Mér finnst ekki eðlilegt að beita nýliða í pólitík sömu hörku og t.d. samgönguráðherra sem hefur verið í  eldlínunni í pólitík í hartnær tvo áratugi.Þar að auki er það kolvitlaus mælikvarði á það fólk sem býður sig fram sem fulltrúar almennings hvernig því gengur að svara hraðaspurningum! 

Þeir sem fyrir eru skulu vera áframAð lokum vil ég benda á að þeir flokkar sem fyrir eru hafa sannarlega búið í haginn fyrir sjálfa sig. Þeir hafa skammtað sér hundruðir milljóna með lögum um fjármál flokkanna og hafa því úr miklu að moða á meðan ný framboð eru rekin á yfirdrætti frambjóðendanna sjálfra.  Svo var líka sett í lög að ný framboð yrðu að ná 5% fylgi til að ná manni á þing.  Eina markmiðið var að hækka þröskuld nýrra framboða í von um að þau næðu ekki árangri.  Þar með verður enn minni endurnýjun í stjórnmálum – og gömlu flokkarnir festa sig enn frekar í sessi.  

Margrét SverrisdóttirHöfundur skipar efsta sæti á lista Íslandshreyfingarinnar  í Reykjavík norður 

Skoðið www.islandshreyfingin.is

Verkalýðskaffi og Kastljós

Í dag stóð Íslandshreyfingin fyrir verkalýðskaffi á kosningaskrifstofum í Reykjavík og Hafnarfirði og var fullt út úr dyrum.

Ég sat fyrir svörum í Kastljósinu í kvöld um heilbrigðismál og auglýsi eftir stefnu Sjálfstæðisflokksins.  Leitið á heimasíðunni þeirra og þið munið ekki finna.

Heimsækið www.islandshreyfingin.is og sjáið okkar góðu stefnu - og enn betra fólk!

 

Sól á Ísafirði

Ég er stödd á Ísafirði ásamt Sólborgu Öldu Pétursdóttur skólafulltrúa, sem skipar þriðja sæti á lista Íslandshreyfingarinnar í Norðvesturkjördæmi.  Veðrið er yndislegt, logn og sól eins og er.  Við verðum á ferðinni í dag og síðdegis  (kl. 17-19) ætlum við að vera viðstaddar opnun kosningaskrifstofu í Slúnkaríki við aðalgötuna á Ísafirði.  Þar verða skemmtiatriði og léttar veitingar. Pálína Vagnsdóttir úr Bolungarvík, oddviti listans, stóð sig mjög vel í umræðuþætti í sjónvarpinu í gær og er sannarlega verðugur fulltrúi þessa kjördæmis.

Íslandshreyfingin opnar líka kosningaskrifstofu í dag að Hlíðarsmára 10 kl. 14:30 og þar verður kaffi, kökur, spjall, söngur og skemmtiatriði.  Allir velkomnir.

Sjáið heimasíðuna www.islandshreyfingin.is

 

Borgar sig að bjarga mannslífi?

Ársfundur Landspítala-háskólasjúkrahúss í dag var mjög góður.  Mörg áhugaverð erindi og bar þar hæst innlegg gestafyrirlesarans Sir Michael Rawlins frá heilbrigðisstofnuninni NICE (National Institut for Health and Clinical Excellece).  Hann ræddi siðferðilegan vanda heilbrigðiskerfisins sem stendur frammi fyrir mikilli fjölgun sjúklinga m.a. vegna hærri lífaldurs, betri tækni sem greinir alla fyrr, vaxandi væntinga til lækninga og síðast en ekki síst takmarkaðs fjármagns.

Stofnunin sem hann stýrir (NICE -sem er opinber stofnun) leitast við að tryggja gæðastaðla í bresku heilbrigðiskerfi og styðja almennt heilsufar.  En hvenig er réttlátast að skipta kökunni?   Með aðferð frjálshyggjunnar: Hver er sjálfum sér næstur og borgar fyrir sig; með nytsemishyggju svo flestir njóti góðs af eða með einhvers konar jafnræðishyggju? 

Stofnunin leitast við að meta áhrif læknisaðgerða til betri heilsu með tilliti til kostnaðar aðgerða sem framkvæma þarf.   Mælieiningin er LÍFSGÆÐI (QUALY), metin út frá mörgum þáttum sem aðgerðin mun hafa áhrif á, s.s. hreyfanleika, að geta séð um sig sjálfur í daglegu lífi, vera laus við sársauka osfrv. hvort sem sjúkilingur þjáist af þunglyndi eða er með bilaða mjöðm, svo dæmi sé tekið.

Mörkin verða alltaf óljós því kerfið á að vera sveigjanlegt.  Að sögn Sir Rawlins getur mannslíf kostað allt að 1,5 milljón punda.  Þar höfum við það.

Þetta er gróf og hraðsoðin endursögn hjá mér en mér finnst þetta mjög áhugaverð umræða.  Það er sérkennilegt að menn skuli vera komnir frá lækningaeiðnum um skyldu til að lina allar þjáningar yfir í umræðu um hvernig eigi að reikna út hvenær það borgi sig að bjarga mannslífi. 

Skoðið nýtt efni á heimasíðu Íslandshreyfingarinnar:   www.islandshreyfingin.is   xI !

 

Kastljós í kvöld

Sigurlín Margrét, varaþingmaður og frambjóðandi Íslandshreyfingarinnar í Reykjavík, stóð sig frábærlega vel í beinni útsendingu í Kastljósinu í kvöld.  Við vorum báðar mættar, nöfnurnar, hún til að ræða félagsmál og ég menntamál.

Sigurlín var sérlega ákveðin og fumlaus í svörum, með aðstoð raddtúlks.  Jákvæðast var að ekki var einu sinni nefnt að þarna væri komin heyrnarlaus kona að tjá sig með aðstoð túlks, það var sjálfsagt og eðlilegt - og þarna hefur Sigurlín rutt brautina sjálf.  Hún  hefur verið mjög ötul baráttukona fyrir bættum hag öryrkja og ekki síst heyrnarlausra. 

Munið að kíkja heimasíðu Íslandshreyfingarinnar:  www.islandshreyfingin.is

 

Norðausturkjördæmi klárt

Við Ómar vorum á Akureyri í dag til að vinna með því frábæra fólki sem ætlar að taka slaginn í Norðausturkjördæmi. Gengið var frá skipan í öll sæti og fimm efstu sætin voru síðan tilkynnt í fjölmiðlum í kvöld.

Hörður Ingólfsson, markaðsráðgjafi á Akureyri er í fyrsta sæti og Kristín Þyrí Þorsteinsdóttir, félagsmálastjóri Fjarðarbyggðar í öðru. Davíð Sigurðarson, framkvæmdastjóri, Egilsstöðum er í þriðja sæti en Eyrún Björk Johannsdóttir, stjórnmálafræðinemi Egilsstöðum, í því fjórða. Fimmta sætið skipar Ásgeir Yngvason, bifreiðastjóri á Akureyri.

Skoðið stefnuna okkar og fólkið á www.islandshreyfingin.is

 

Fylgi Íslandshreyfingarinnar eykst í Reykjavík suður

Samkvæmt skoðanakönnun Capacent Gallup um fylgi flokka í Reykjavík suður, sem birt var í dag, sækir Íslandshreyfingin í sig veðrið og mælist með meira fylgi en Framsókn og Frjálslyndir.

Sjálfstæðisflokkurinn fengi 42,5%, Samfylkingin fengi 24,9%, VG 18,8%, Íslandshreyfingin 5,4 %. Framsóknarflokkurinn fengi 4,5% atkvæða og Frjálslyndi flokkurinn 3,9% atkvæða.

Við erum að sækja í okkur veðrið.  Ungliðar Íslandshreyfingarinnar stóðu fyrir skemmtikvöldi á Hressó í gærkvöldi.  Fullt hús og uppistand með nýkrýndum sigurvegurum í gríni, auk þess sem við Ómar ávörpuðum samkomuna  Ómari var mikið fagnað enda vinsæll og skemmtilegur. 

Auð - lesið mál

Í gærkvöldi var ég á fundi í Hinu húsinu hjá Tipp-Topp sem er félagsstarf fatlaðra og þroskaheftra.  Mættir voru frambjóðendur allra flokka til að kynna áherslumál  í kosningabaráttunni.  Umræður voru fjörugar og spurt um allt mögulegt, en sumir frambjóðendanna voru helst til langorðir og reyndu á þolinmæði gestanna.

Fundarmenn þekktu vel Íslandshreyfingu Ómars og Margrétar.  Ég dreifði til þeirra punktum um helstu baráttumál sem snúa að þeirra hag og hafði það á auðskildu máli eins og Átak, félag þroskaheftra hefur óskað eftir.  Þeir punktar fara á heimasíðu Íslandshreyfingarinnar, www.islandshreyfing.is

Fundargestir höfðu miklar áhyggjur af fjárhag öryrkja og finnst hann bágur. Svo voru margir sem kvörtuðu yfir því að böllin í Árseli væru alltof stutt.  Það er reyndar ekki við Ársel að sakast, því það eru víst vaktaskipti á sambýlum á kvöldin sem taka þarf tillit til. 

Lág laun ummönnunarfólks í þessum geira eru auðvitað alvarlegt vandamál vegna þess að þau eru ávísun á tíð starfsmannaskipti. Starfsfólk sem hefur tengst skjólstæðingum sínum traustum böndum hverfur á braut og þó svo gott fólk komi í staðinn, þá þarfnast þessi hópur öryggis umfram marga aðra þjóðfélagshópa.