Átakafundur Kjördæmafélags Reykjavíkur í dag

Aðalfundur Kjördæmafélags Frjálslynda flokksins í Reykjavíkurkjördæmum var haldinn í dag á Kaffi Reykjavík. Fundurinn var fjölmennur, rúmlega 100 manns mættu.  Þetta var átakafundur en niðurstaðan varð jákvæð þegar upp var staðið og ágæt stjórn mynduð.  Á fundinn mætti nokkur hópur fólks sem lítið hefur komið að starfi flokksins til þessa og hafði sig mjög í frammi, var m.a. með ávirðingar úr pontu og frammíköll.  Hingað til hafa fundir flokksins ekki verið með slíkum blæ og mér finnst þetta mjög neikvæð þróun.

Rétt kjörin stjórn:    Eyjólfur Ármannsson, Egill Örn Jóhannesson, Guðrún Ásmundsdóttir, Kolbeinn Guðjónsson og Kjartan Eggertsson.

 

Sigurlín sigurvegari

 Úr bloggi Sigurlínar Margrétar Sigurðardóttur, varaþingmanns Frjálslynda flokksins í Suðvesturkjördæmi í dag:

 "Ég get ekki sagt annað en að ég sé mjög ánægð með niðurstöðuna á miðstjórnarfundi Frjálslynda flokksins sem ég missti af í gærkvöldi.  Mér finnst þetta skynsamleg lending, nokkurskonar sátt milli allra og er það vel. Um upphaf deilanna ætla ég sem minnst að tjá mig um en það skiptir í raun engu hvert deiluefnið er, menn og konur í svona stöðu eiga bara ekkert að vera að deila með blaðamenn hangandi fyrir sér sem skrumskæla hvert orð.   Ég hef oft verið spurð á meðan þessu stóð með hverjum ég stæði, manni var stundum eins og stillt upp á vegg og krafist svara af manni.  Ég er ekkert mikið fyrir að skipa mér í eitthvað horn með hinum og þessum. Það er málefnastefna flokks míns sem gildir og hún er í fullu gildi hvað öllum deilum líður. En hér get ég alveg sagt að Margrét Sverrisdóttir er mín kona, hún er minn mentor í þátttöku minni í stjórnmálastarfi. Það er hún sem prófarkarles allar greinar mínar og ræður án þess svo mikið að breyta efninu á nokkurn hátt, hugsun mín í efnið er það sem gildir. Margréti Sverris kynntist ég fyrst fyrir alvöru þegar ég fékk boð frá félagsmálaráðuneytinu um að taka þátt í námskeiði fyrir konur í stjórnmálastarfi árið 2003.  Ég mátti velja mér leiðbeinanda og ég valdi Margréti Sverrisdóttur af þeirri ástæðu að mér fannst og finnst hún enn vera mikill leiðtogi, framsýn með einsdæmum og stendur fast á sínu.  Eftir því sem ég kynntist henni betur sá ég að ég hafði rétt fyrir mér. Það er gott að vinna með henni.  Hún ver málefnastefnu flokks síns af heillindum og veit alveg hvað hún er að tala um þegar hún þylur yfir stefnuskránna sem og veit nákvæmlega fyrir hvort málefni falla inn í stefnu flokksins eða ekki. Margt í stefnuskrá flokksins lýtur að sjálfsögðum mannréttindum. Hún er líka trú sínu fólki.  Þingmenn flokksins hafa verið mjög heppnir að hafa hana sem framkvæmdastjóra sinn þetta kjörtímabil, hún hefur reynst þeim vel og það veit ég."

Sigurlín, kærar þakkir fyrir hlý orð í minn garð.  Þú veist sjálf hversu mikils ég met þig - enda met ég þig að verðleikum.  Þú ert einstök kona og ég hef alltaf dáðst að sjálfstæði þínu, kjarki, frábærri kímnigáfu og greind.  Það er ótrúlegt að kynnast því hvernig þú stendur alltaf stolt og berst fyrir rétti þínum og fjölda annarra.  Ástæðan fyrir því að ég breyti ekki hugsun þinni við yfirlestur greina sem þú skrifar er einfaldlega sú að hugsunin kemur alltaf skýrt fram.  Það er fullkomlega eðlilegt að það þurfi að ,,snurfusa" (eins og við köllum það báðar) lítið eitt ritaðan texta hjá konu sem hefur ekki heyrt mælt mál síðan hún var barn.  En það hefur verið sérstök lífsreynsla að kynnast því hvernig þú hefur rutt öllum hindrunum úr vegi og staðið stolt og keik í ræðupúlti á Alþingi og barist fyrir jafnrétti allra þjóðfélagshópa. Þú verðskuldar sannarlega að vera í fararbroddi í kosningum til Alþingis á vori komanda.

Baráttukveðja,  þinn vinur Margrét Sverrisdóttir.

Þakkir fyrir hvatningu - Þrífarar

 

Sæl, öll.

Fyrst vil ég þakka fyrir jákvæð viðbrögð sem borist hafa í athugasemdum og í tölvupósti til mín.  Það væri líka gaman að heyra frá ykkur í netpósti á [e-mail]

Spaugarasíðan baggalútur.is hefur fundið þrí-farana mína. Skoðið heimasíðuna hér

Launað leyfi frá 18.desember og framyfir landsþing

Ég vil  byrja á að afsaka hvað bloggið mitt hefur verið laust við alla pólitík undanfarið.  Það var ekki af því ekkert væri að gerast, heldur þvert á móti - það var svo mikið um að vera að réttast var að segja sem minnst  

Þetta var góður miðstjórnarfundur hjá okkur Frjálslyndum í kvöld, með huggulegu jólahlaðborði.  Gott andrúmsloft, jólalegt og fallegt á Kaffi Reykjavík. Sátt náðist um það að ég (framkvæmdastjóri flokksins) færi í launað leyfi frá störfum sem framkvæmdastjóri framyfir landsþing flokksins sem fram fer 26.-27. janúar. Ég mun þó áfram sinna ýmsum störfum fyrir flokkinn, enda kjörin í trúnaðarstörf.   Almenn sátt ríkti um þessa niðurstöðu fundarins.

Farið var ítarlega yfir ágreiningsefnin og niðurstaða fundarins var sú að setja niður deilur innan flokks í bili að minnsta kosti og undirbúa landsþingið. Óskað var eftir því að ég kæmi að undirbúningi landsþingsins  sem ritari og fulltrúi í framkvæmdastjórn og einnig var ég beðin um að sinna fjármálum flokksins.

Gert er ráð fyrir að ég komi aftur að mínu starfi sem framkvæmdastjóri eftir landsþing nema ég yrði orðin formaður eða varaformaður, því þá væri staðan auðvitað allt önnur.

Ég ætla að svo stöddu ekki að gefa neitt upp um það hvort ég gef kost á mér í kjöri til formanns eða varaformanns.   Hvað finnst ykkur um það?  Gaman væri að fá svör eða athugasemdir frá ykkur

 

Stjörnukortið mitt

Gunnlaugur Guðmundsson spáir í stjörnurnar á mbl.is/stjörnuspeki

"Margrét Sverrisdóttir í Frjálslynda flokknum er jarðbundin, yfirveguð og umhyggjusöm. Hún er raunsæ og hógvær og setur sjálfa sig ekki alltaf í fyrsta sæti. Hún hefur sterka ábyrgðarkennd." 

Ef þið hafið áhuga á stjörnuspeki getið þið lesið meira með því að smella hér.

Spaugstofan laugardaginn 9. desember

Spaugstofuliðið spaugaði mjög skemmtilega með Frjálslynda flokkinn í þættinum í kvöld, laugardaginn 9. desember.  Sett var upp atriði sem var eins og í leikritinu ,,Gullna hliðið" eftir Davíð Stefánsson (Oft kallað ,,Sálin hans Jóns míns).  Þar er Guðjón Arnar eins og kerlingin hans Jóns að reyna að lauma syndugri sálinni hans Jóns Magnússonar (úr Nýju afli) inn í himnaríki, en ég er í hlutverki Lykla-Péturs/ Sankti Péturs og kölluð Heilög Margrét - og vil ekki sjá Jón. Svo kemur pabbi til sögunnar í gervi andskotans og flytur magnaðan kveðskap um afl-leysi Nýs afls, enda er hann þekktur fyrir mergjað málfar.  Þetta var bráðskemmtilegt 

Sjón er sögu ríkari og hér er tengill á þáttinn (pottþétt þjónusta hjá Ríkisútvarpinu)

http://dagskra.ruv.is/streaming/sjonvarpid/?last=2164

 

Fylgi Frjálslyndra eykst - Helgarferð - Fyrirsagnir frétta

Enn eykst fylgi Frjálslynda flokksins

Skv. könnun sem tímaritið Mannlíf birti í dag  er Frjálslyndi flokkurinn með 13% fylgi á landsvísu. 
Könnunin var framkvæmd dagana 21. - 24. nóvember síðastliðinn og svöruðu 5.147 manns á aldrinum 18-70 ára.

Mjög ánægjuleg tíðindi sem koma mér ekki á óvart því að inngöngubeiðnir streyma inn svo ég anna því varla að skrá (handplokka   - sbr. færslu 6. des) nýtt flokksfólk.

Orka sótt í fjall og fjöru

Við hjónin ákváðum að skella okkur ,,heim" til Ísafjarðar 

yfir helgina í slökun eftir ótrúlegan eril og stanslaust áreiti að undanförnu.  Við komumst ekki af stað úr borginni fyrr en eftir vinnu, svo við náðum ekki að aka í björtu. Ferðin gekk samt mjög vel, vegir voru nær auðir alveg norður fyrir Strandir, en Djúpið nokkuð viðsjárvert, enda launhált.  Náðum hingað fyrir miðnætti og sækjum orku í fjall og fjöru hér vestra! 

Fyrirsagnir frétta                                                                                             Frétt í Morgunblaðinu í gær, fimmtudaginn 7. desember, vakti athygli mína.  Fyrirsögn og undirfyrirsögn voru þessar:

 

10% unglinga í tíunda bekk reykja daglega

40% segjast hafa orðið ölvuð og 10% hafa prófað hass

Þetta virðast vera mjög slæm tíðindi við fyrstu sýn. Ég hefði miklu frekar viljað hafa þetta á jákvæðu nótunum og snúa þessu alveg við:

90% unglinga í tíunda bekk reykja ekki (eða sjaldnar en daglega)

60% segjast ekki hafa orðið ölvuð og 90% hafa ekki prófað hass.

Kannski litum við tilveruna bjartari augum ef fyrirsagnir væru oftar á jákvæðu nótunum.  Ekki síst á það við um æsku landsins sem er bara virkilega efnileg

Könnun dagsins á bylgjan.is og skopmynd

Hérna eru niðurstöður úr könnun gærdagsins á bylgjan.is:

Ég er rauða súlan (77%)
Þetta er ekkert vísindaleg könnun en hún kom mér óneitanlega þægilega á óvart. Ég er innilega þakklát fyrir stuðninginn!

Þessa bráðskemmtilegu skopmynd teiknaði Halldór Baldursson hinn landskunni og hæfileikaríki teiknari. Mér finnst hann samt þurfa að æfa andlitsdrættina aðeins betur!

 

 

Valdasjúk kona handvelur flokksfélaga

Viðtal við fulltrúa Nýs afls á Útvarpi Sögu í gær kitlaði heldur betur hláturtaugar mínar.  Höskuldur Höskuldsson, varaformaður Nýs afls, sagði í viðtali á Útvarpi Sögu að hin valdasjúka Margrét (ég) hefði árum saman handvalið fólk í Frjálslynda flokkinn!  Líklega valdi ég bara fólk sem var líklegt til að styðja mig til valda?  Þá vitum við það: Félagar í Frjálslynda flokknum eru handplokkaðir   enda hef ég mikla reynslu af slíku, vann við að plokka bæði rækjur og humar á yngri árum. 

Í dag hef ég unnið af krafti við að ganga frá greinum og auglýsingum í jólablað Frjálslynda flokksins, sem er óðum að taka á sig mynd.  Við ætlum að senda það á alla flokksmenn fyrir jólin. Svo gekk ég frá bréfum og sendi á alla eigendur húsnæðis í Aðalstræti 9, þar sem flokkskrifstofan okkar er af því ég er formaður húsfélagsins.

Í dag bauð Sólveig Pétursdóttir, forseti Alþingis, þingmönnum og starfsfólki í jólamat á Hótel Borg.  Hangikjöt og jólalög, mjög hátíðlegt. Það eru alltaf veitt möndluverðlaun og næst (ef ég kemst oftar?) ætla ég að hafa möndlu meðferðis.

Svo fer ég í fjörugt kvennaboð (sem karlmaður heldur!)  í kvöld kl. 19 og hlakka mikið til. 

Fyrsta bloggið mitt, Master-mind framaplottið og jólafundur í kvöld

Ég hef ekki bloggað hingað til, en svo virðist sem líf mitt gerist æ fjörugra og kannski vill stuðningsfólk mitt fylgjast með því helsta sem á dagana drífur. Ég er mjög þakklát og beinlínis hrærð yfir viðbrögðum sem ég hef fengið frá fólki um allt land eftir viðtalið við mig í Kastljósinu 3. des.  Síminn hefur ekki stoppað, sms-skeytum rigndi inn og fólk er ótrúlega hlýlegt og hvetjandi.

Örfá dæmi úr tölvupóstinum mínum:

Sæl Margrét,vildi bara senda stutta kveðju.
Það var sérlega ánægjulegt að fylgjast með þér í sjónvarpinu í kvöld.
Óneitanlega tilbreyting að sjá stjórnmálamann sem maður treystir.
Um það voru allir á mínu heimili sammála.

Heil og sæl Margrét! Ég, við og okkar fólk stöndum með þér á þessum umrótartímum. Góður þáttur í sjónvarpinu. Flokkurinn væri stærri í Reykjaneskjördæmi ef þú værir þar.

Sæl Margrét! Þú þekkir mig nú ekki og ég fylgist nú ekki mikið með pólitík, en nú blöskrar mér framkoma sumra ónefndra þingmanna. Þú hefur staðið þig alveg frábærlega vel í öllu sem þú hefur tekið þér fyrir hendur. Oft þurft að vera í vörn, en alltaf svarað kurteislega og komið vel fram. Ég treysti þér.

Sæl Margrét. Þú stóðst þig frábærlega vel í Kastljósþættinum í gærkvöldi. Hvet þig eindregið til að bjóða þig fram til formanns í flokknum. Þú átt minn stuðning.

Langaði að senda þér þennan tölvupóst til að lýsa stuðningi við þig og þína afstöðu er varðar þetta mál. Eg tek fram að ég er ekki flokksbundinn og hef ekki verið en hef fylgst með þér í gegn um tíðinna. Stattu þig stúlka því þú hefur góðan og vandaðan málstað að verja. Bestu kveðjur, með ósk um gott gengi þitt í framtíðarstjórnmálum.

Vertu sterk, Margrét og láttu ekki draga úr þér kjarkinn - ein af dauðasyndunum sjö er öfundin og henni skýtur upp kollinum þegar e-r ber af eins og þú gerir! Svona nornaveiðar standa yfirleitt stutt en mjög mikilvægt að standa þær af sér!

Alveg á hreinu að þú hefur mikið persónulegt fylgi – hef lýst því yfir oftar en einu sinni að ég styddi þig til hverra þeirra verka sem þú gæfir kost á þér – er reyndar ekki einu sinni í sama kjördæmi.

Treysti því enn að þú komist á þing og hristir upp í þessum skápum! Baráttukveðjur!

En ég má til með að nota tækifærið hér og vísa á bug kenningum um að ég hafi búið til einhvern málefnaágreining til þess eins að sækjast eftir valdastöðu innan flokksins. Ég hef alltaf haft metnað til þess að vera í forystu flokksins - og reyndar verið í forystu. En málefnaágreiningurinn sem ég á að hafa búið til var öllum svo auðsær, að landsþekktur sjónvarpsmaður spurði strax flokksfélaga minn hvort það væri öruggt að mér félli málflutningur Jóns Magnússonar um múslima. Gárungarnir kalla þetta núna Master-mind framaplottið, en er það ekki ansi langsótt skýring að ég hafi reynt að skapa ágreining og látið segja mér upp störfum vegna þess ef ég ætlaði að sækja í valdastöðu sem allir hafa lengi talið sjálfsagt að ég sæktist eftir :)

Í kvöld fer ég á jólafund Kvenréttindafélags Íslands og Kvennasögusafnsins sem hefst kl. 20 á Kvennaheimilinu Hallveigarstöðum við Túngötu. Ég er varaformaður Kvenréttindafélagsins.

Þar verður fjallað um upphaf kvenréttindabaráttu á Íslandi og þátt karla (og kvenna!) í henni.
Þórunn Valdimarsdóttir rithöfundur les upp úr bókinni um Matthías Jochumsson, lesið verður upp úr bókinni um Ólafíu og Auður Styrkársdóttir forstöðumaður Kvennasögusafns Íslands fjallar um Hannes Hafstein og þátt hans í kvenréttindabaráttu.

Auk þess verða veitingar, tónlist, happdrætti og fleira. Ég hlakka til og vona að jafnréttissinnar láti sjá sig!